شبكــــــــــــــــــــــــــة ابانــــــــــــــــــوب المنـــــــــــــــــــــــــــــــــدره

مرحبا بكم فى شبكة ابانوب المندره
لا نريدك زائر بل صاحب مكان

سجل الان





شبكــــــــــــــــــــــــــــة ابانــــــــــــــــــوب المنـــــــــــــــــــــــــــــــــدره
 
الرئيسيةالتسجيلدخول

شاطر | 
 

 شعر لمصر

استعرض الموضوع السابق استعرض الموضوع التالي اذهب الى الأسفل 
كاتب الموضوعرسالة
ابانوب شنوده



الابراج الابراج : الميزان عدد المساهمات : 898
نقاط : 2014
السٌّمعَة : 5
تاريخ التسجيل : 04/09/2009
العمر : 21

مُساهمةموضوع: شعر لمصر   الثلاثاء 8 سبتمبر - 14:03


قالولي بتحب مصر فقلت مش عارف
المعنى كعبة وانا بوَفْد الحروف طايف
وألف مغزل قصايد في الإدين لافف
قالولي بتحب مصر فقلت مش عارف
أنا لما اشوف مصر ع الصفحة بكون خايف

ما يجيش في بالي هرم ما يجيش في بالي نيل
ما يجيش في بالي غيطان خضرا وشمس أصيل
ولا جزوع فلاحين لو يعدلوها تميل
حكم الليالي ياخدهم في الحصاد محاصيل
ويلبّسوهم فراعنة ساعة التمثيل
وساعة الجد فيه سخرة وإسماعيل
ما يجيش في بالي عرابي ونظرته في الخيل
وسعد باشا وفريد وبقيّة التماثيل
ولا ام كلثوم في خِمسانها ولا المنديل
الصبح في التاكسي صوتها مبوظُّه التسجيل
ما يجيش في بالي العبور وسفارة اسرائيل
ولا الحضارة اللي واجعة دماغنا جيل ورا جيل
قالولي بتحب مصر أخدني صمت طويل
وجت في بالي ابتسامة وانتهت بعويل

قالولي بتحب مصر فقلت مش عارف
لكني عارف بإني إبن رضوى عاشور
أمي اللي حَمْلَها ما ينحسب بشهور
الحب في قلبها والحرب خيط مضفور
تصبر على الشمس تبرد والنجوم تدفى
ولو تسابق زمنها تسبقه ويحفى
تكتب في كار الأمومة م الكتب ألفين
طفلة تحمّي الغزالة وتطعم العصفور
وتذنِّب الدهر لو يغلط بنظرة عين
وبنظرة أو طبطبة ترضى عليه فيدور

وأمي حافظة شوارع مصر بالسنتي
تقول لمصر يا حاجّة ترّد يا بنتي
تقولها احكي لي فتقول ابدأي إنتي

وأمي حافظة السِيَر أصل السِيَر كارها
تكتب بحبر الليالي تقوم تنوَّرْها
وتقول يا حاجة إذا ما فرحتي وحزنتي
وفين ما كنتي أسجل ما أرى للناس
تفضل رسايل غرام للي يقدّرها

أمي وأبويا التقوا والحر للحرة
شاعر من الضفة برغوثي وإسمه مريد
قالولها ده أجنبي، ما يجوزش بالمرة
قالت لهم ياالعبيد اللي ملوكها عبيد
من إمتى كانت رام الله من بلاد برة
يا ناس يا أهل البلد شارياه وشاريني
من يعترض ع المحبة لما ربّي يريد

كان الجواب ان واحد سافر اسرائيل
وانا أبويا قالوله يللا ع الترحيل

دلوقت جه دوري لاجل بلادي تنفيني
وتشيِّب أمي في عشرينها وعشريني
يا أهل مصر قولولي بس كام مرة
ها تعاقِبوها على حُبَّ الفلسطيني

قالولي بتحب مصر فقلت مش عارف

بحب أقعد علىالقهوة بدون أشغال
شيشة وزبادي ومناقشة في مآل الحال
وبصبصة ع البنات اللي قوامهم عال
لكن وشوشهم عماير هدها الزلزال
بحب لمعي وحلابِسَّة ومُحِّب جمال
أروح لهم عربية خابطة في تروللي
كإنها ورقِة مِسودّة مرميّة
جوّاها متشخبطة ومتكرمشة هيّه
أو شلّة الصوف، أو عقدة حسابيّه
سبعين مهندس ولا يقدر على حلي
فيجيبوا كل مفكّاتهم وصواميلهم
ويجرّبوا كل ألاعيبهم وتحاييلهم
ساعات كمان يغلطوا ويجربوا فيّه
بس الأكيد أنهم بيحاولوا في مشاكلي
وإنها دايماً أهون من مشاكلهم

أحب اقعد على القهوة مع القاعدين
وابص في وشوش بشر مش مخلوقين من طين
واحد كإنه تحتمس، يشرب القرفة
والتاني غلبان يلف اللقمة في الجرانين
والتالتة من بلكونتها تنادي الواد
والواد بيلعب وغالبهم ثلاثة اتنين
أتوبيس كإنه كوساية محشي بني آدمين
أقول بحكم القاموس، إن الهواء جماد
واشم ريحة شياط بس اللي شايفه رماد
عكازة الشيخ منين نابت عليها زناد
يسند على الناس ويعرج من شمال ليمين
والراديو جايب خبر م القدس أو بغداد

قالولي بتحب مصر فقلت مش عارف

قطر الندى قاعدة بتبيع فجل بالحزمة
أميرة عازز عليها تشحت اللقمة
عريانة ما سترها الا الضل والضلمة
والشعر الابيض يزيد حرمة على حرمة
والقلب قايد مداين زي فرشة نور
والفرشة واكلاها عتة والمداين بور
اللي يشوفها يقول صادقة حكاوي الجن
واللي يشوفها يقول كل الحقايق زور

عزيزة القوم عزيزة تشتغل في بيوت
عشر سنين عمرها لكن حلال ع الموت
صبية تمشي تقع ويقولو حكم السن
وسِتّها شعرها أصفر وكلّه بُكَل
كإنها مربية فيه اربعين كتكوت
ووشها زي وش الحاكم العربي
كإن خالقها راسمها على نبوت
تحكم وقطر الندى تسمع لها وتئن
أصل البعيدة وليّة أمرها، عجبي
على الهوا بحجة الكسوة يقيموا له سور

أحكي يا قطر الندى والا ما لوش لازمة
حكاية ابن الأصول تفضل معاه لازمة
فيه ناس بتلدغ وناس ليها البكا لازمة
ياللي سطلت الخليفة بجوز عينين وشعور
كنت سما للأغاني والأغاني طيور
مين اللي باعك، عدوك، بعض أولادك
مين اللي كانوا عبيدك صاروا أسيادك
مين اللي سمى السلاسل في إديك دِبَل
مين اللي خط الكتاب مين كانوا أشهادك
وازّاي متى سألوكي "هل قبلتِ به"
سكتِّ ومشيتِ يا مولاتي في الزفة
لبنان وغزة وعراق فينا العدو تشفى
حطوا جثثنا يا حاجة تحت سجادك
ووقفت تستنى خيط الدم يبقى بحور

قالولي بتحب مصر فقلت مش عارف
لا جيتها سايح ولاني أعمي مش شايف
بلد علمها انمزع والرفّا في المساجين
ومهر مربوط في كارو وباله في البساتين
وابو زيد سلامة على كرسي وكيس جلوكوز
لجنة مشايخ تناقش فتوة الأراجوز
سؤال نعيش أو نموت، فيه لا يجوز ويجوز

لو السقوف خايخة نسندها بحجارة وطوب
لكن ده لوح القزاز كله ضرب تشريخ
لو الولد حرف في الآية، ها يبقى يتوب
بس المصيبة إذا الآية اخترعها الشيخ

يا مصر كومة حروف إبر المعاني فين
إبر بتجرح إيدينا قبل ما بتبان
نسرك في بال السما بيقول حدودها منين
نسرك بياكله الصدا في بدلة السجان

يا قلعة السجن يا قلعة صلاح الدين
أنا بقولك وأهلي ع الكلام شاهدين
لو كنت حرة ما كناش نبقى محتلين

والناس شكاير صريخ رابطين عليها سكوت
آهات سَكوتَة كإن الأرض مستشفى
مطرودة منها الدكاترة ف سجن أو منفى
والناس بتسأل هنصبر والا نتوفى
فيه ناس تقول زي بعضه دول نوعين م الصبر
وناس تقول زي بعضه دول نوعين م الموت
يا مصر بعض التسامح يبقى عار وبأجر
إفتكري "لا تحسبّن" مكتوبة فوق كام قبر
والتار يبات يصحى تاني لو يشيب الدهر
والتار حصان غير لصاحبه ما يلين ضهر
والتار تار العرب وعشان كده تار مصر

قالولي بتحب مصر فقلت مش عارف
لا جيتها سايح ولاني أعمى مش شايف
ولاني هايف اردّ بخفّة وبسرعة
وكل من رد يا كذاب يا هايف

أصل المحبة بسيطة ومصر تركيبة
ومصر حلوة ومُرَّة وشِرْحة وكئيبة
دا نا اختصر منصب الشمس وأقول شمعة
ولا اختصر مصر وانده مصر يا حبيبة

يا أهل مصر اسمعوني واسمعو الباقيين
إن كنت انا رحّلوني كلنا راحلين
يا أهل مصر يا أصحابي يا نور العين
يا شنطة المدرسة يا دفتر العناوين
يا ضغطة البنت بلكراسة ع النهدين
ترقص قصاد المراية، واحنا مش شايفين
يا صحن سلطان حسن يا صحن كحك وتين
يا ألف مدنا وجرس، لألف ملّة ودين
يا أهل مصر اسمعوني، والكلام أمانات
قلتولي بتحب مصر فقلت مش عارف
روحوا اسألوا مصر هيّه عندها الإجابات




عدل سابقا من قبل BOBOS SHENODA في الأربعاء 9 سبتمبر - 7:32 عدل 1 مرات
الرجوع الى أعلى الصفحة اذهب الى الأسفل
admin
Admin
Admin


الابراج الابراج : السرطان عدد المساهمات : 7115
نقاط : 20222
السٌّمعَة : 27
تاريخ التسجيل : 21/08/2009
العمر : 42
الموقع : admin

مُساهمةموضوع: رد على الشعر   الثلاثاء 8 سبتمبر - 15:41

ايه الجمال دة بجد شعر جميل اوى





:879:
الرجوع الى أعلى الصفحة اذهب الى الأسفل
http://elnehesy.yoo7.com
ماريا الشقيه



الابراج الابراج : الثور عدد المساهمات : 1927
نقاط : 3010
السٌّمعَة : 15
تاريخ التسجيل : 06/09/2009
العمر : 20
الموقع : المندره قبلي ـ كنيسه الشهيد ابانوب

مُساهمةموضوع: رد: شعر لمصر   الثلاثاء 8 سبتمبر - 16:42

ايه المواهب الجامده ديييييييييييييييييييييييييييييي 888 888 888 888 888 888 888 888 888 888 888
الرجوع الى أعلى الصفحة اذهب الى الأسفل
شيرين زكى



الابراج الابراج : الدلو عدد المساهمات : 696
نقاط : 1121
السٌّمعَة : 5
تاريخ التسجيل : 01/09/2009
العمر : 20

مُساهمةموضوع: رد: شعر لمصر   الثلاثاء 8 سبتمبر - 17:01

:89: :89: :89: :89: انا عرفه انك جيبه من على النت لكن جميل جدا
الرجوع الى أعلى الصفحة اذهب الى الأسفل
bibo messi



الابراج الابراج : العقرب عدد المساهمات : 201
نقاط : 487
السٌّمعَة : 0
تاريخ التسجيل : 08/09/2009
العمر : 22

مُساهمةموضوع: رد: شعر لمصر   الثلاثاء 8 سبتمبر - 17:19

انت حد جميل اوي يا بيبو علشان عرفت تكتب شعر زي دة



اة الجمال دة :82:
:89:




bibo misse
الرجوع الى أعلى الصفحة اذهب الى الأسفل
ابانوب شنوده



الابراج الابراج : الميزان عدد المساهمات : 898
نقاط : 2014
السٌّمعَة : 5
تاريخ التسجيل : 04/09/2009
العمر : 21

مُساهمةموضوع: رد: شعر لمصر   الأربعاء 9 سبتمبر - 7:02

ميرسي بس انا مش كاتبة كلة انا اخدت الجزء الاول من على النت وكملت عليه
الرجوع الى أعلى الصفحة اذهب الى الأسفل
ابانوب شنوده



الابراج الابراج : الميزان عدد المساهمات : 898
نقاط : 2014
السٌّمعَة : 5
تاريخ التسجيل : 04/09/2009
العمر : 21

مُساهمةموضوع: رد: شعر لمصر   الأربعاء 9 سبتمبر - 7:30

انا مش هرد عليكي يا شيرين
الرجوع الى أعلى الصفحة اذهب الى الأسفل
mena
Admin
Admin


عدد المساهمات : 368
نقاط : 552
السٌّمعَة : 4
تاريخ التسجيل : 04/09/2009

مُساهمةموضوع: رد: شعر لمصر   الأربعاء 9 سبتمبر - 10:11

:75: :95: على فكرة يا بيبو الكلام دة فى الجووووووووووون
الرجوع الى أعلى الصفحة اذهب الى الأسفل
ابانوب شنوده



الابراج الابراج : الميزان عدد المساهمات : 898
نقاط : 2014
السٌّمعَة : 5
تاريخ التسجيل : 04/09/2009
العمر : 21

مُساهمةموضوع: رد: شعر لمصر   الأربعاء 9 سبتمبر - 10:55

طول عمري هداف يا استاذ ميناااااااااا
الرجوع الى أعلى الصفحة اذهب الى الأسفل
كاترين



الابراج الابراج : الجوزاء عدد المساهمات : 57
نقاط : 116
السٌّمعَة : 3
تاريخ التسجيل : 02/09/2009
العمر : 60
الموقع : كاترين

مُساهمةموضوع: رد: شعر لمصر   الأحد 13 سبتمبر - 4:34

ربنا يعزض تعبك بجد تحفة :35: :35: :35: :35: :35: :35: :35: :35: :38: :38:
الرجوع الى أعلى الصفحة اذهب الى الأسفل
ابانوب شنوده



الابراج الابراج : الميزان عدد المساهمات : 898
نقاط : 2014
السٌّمعَة : 5
تاريخ التسجيل : 04/09/2009
العمر : 21

مُساهمةموضوع: رد: شعر لمصر   الثلاثاء 15 سبتمبر - 19:23

مرس يامريم وشكرا ليكم كلكم
الرجوع الى أعلى الصفحة اذهب الى الأسفل
 
شعر لمصر
استعرض الموضوع السابق استعرض الموضوع التالي الرجوع الى أعلى الصفحة 
صفحة 1 من اصل 1

صلاحيات هذا المنتدى:لاتستطيع الرد على المواضيع في هذا المنتدى
شبكــــــــــــــــــــــــــة ابانــــــــــــــــــوب المنـــــــــــــــــــــــــــــــــدره :: المعلومات العامه :: قسم معلومات عامه و رسائل موبايلات-
انتقل الى: