(( المنظر العام فى حوش الكنيسة يقف ميلاد فى قلق وينظر الى ساعته منتظرا وصول صديقه نادر & ثم يدخل نادر فى تكاسل وحزن على وجهه ))
ميلاد مالسه بدري يا أستاذ نادر مستعجل ليه
نادر مساء الخير يا ميلاد معلش اتاخرت عليك شويه
ميلاد العادى بتاعك . فين التونيه بتاعتك مش متفقين هانلبس شمامسه النهاردة فى قداس العيد زى كل سنه
نادر معلش يا ميلاد انا مش هالبس شماس السنة دى روح انت ادخل الكنيسة وانا هافضل واقف هنا
ميلاد معقول هاتفضل واقف فى حوش الكنيسة والقداس شغال جوه احنا عمرنا معملناها ده تصرف ماليقش باولاد ربنا ، ايه اللى حصلك النهارده
نادر اصلى زعلان شويه ومش مركز ومحتار
ميلاد زعلان ومحتار ، احكيلى ايه الموضوع
نادر انبارح كنت بعترف عند ابونا علشان اتناول النهارده وبعدين قلتله انا نفسي يا أبونا الزمان يرجع بيه لغاية يوم الولاده واكون موجود جوه المذود اللى اتولد فيه السيد المسيح
ميلاد ياه دي حاجه جميله قوى يا ريت وانت رايح تبقى تقولي علشان اجى معاك
نادر تيجى معايا فين انت شايفنى رحت فى مكان ما واقف معاك ماتحركتش
ميلاد ما عارف يا اخى بقولك لما تكون ناوى تسافر للزمان الماضي خدني معاك
نادر انت بتتريق عليه يا ميلاد
ميلاد لاء صدقنى مش قصدى ، المهم أبونا قالك ايه
نادر ما هو ده اللى مزعلنى ومخلينى محتار لان ابونا قالى وليه ترجع بالزمان وتسافر لغاية بيت لحم ماهو ممكن المذود يكون جواك والمسيح برضه يتولد فيه
ميلاد ايه الكلام ده ، يعنى ايه المذود يكون جواك انا مش فاهم حاجه
نادر شفت بقى انا ليه محتار
ميلاد طيب ليه ماسئلتش أبونا وهوه يفهمك
نادر وانا مافهمش لوحدى ليه هوه انا صغير
ميلاد أنت غلطان مش عيب انك تسأل وتقول انا مش فهم بدل ما انت واقف محتار كده
نادر اهوه اللي حصل بقى مسئلتوش وخلاص
ميلاد انا عندى فكرة حلوه ( يتحرك وهو يفكر ) ماتيجى نتخيل اننا رجعنا بالزمان وسافرنا لحد بيت لحم ونشوف ايه اللى ممكن يحصل ومين الناس اللى هانقابلهم فى الطريق وإحنا رايحين للمذود
نادر فكره جميله يا ميلاد ، انا موافق بس ازاى
( يتحرك الاثنان حول بعضهم فى صمت وتفكير ويتغير المكان والاشكال كانهم رجعوا للزمان القديم الى يوم الميلاد المجيد ،،،، يظهر فجأة رجل عجوز محنى الظهر وماسك عكاز فى يده )
ميلاد الحق يا نادر ده الموضوع باين قلب بجد احنا فين ومين الراجل ده
العجوز انتو مين يا ابني وعاوزين مين انتو شكلكم غريب كده ليه
نادر ممكن تقولنا احنا فين
العجوز انتو فى اورشليم
نادر وميلاد اورشليم ............... !
ميلاد انا مالى انا عاوز اروح بيتنا
العجوز ماقلتليش انتو مين وعاوزين ايه بالظبط
نادر انا اسمى نادر وده صديقى ميلاد فى الحقيقة احنا كنا عاوزين نروح بيت لحم عند المذود اللى هناك
العجوز عند المذود ، ليه يا ابنى انت عاوز تشترى بقره من هناك
نادر لاء رايحين نشوف يسوع المسيح المخلص ملك اليهود
العجوز ( فى فرح ) ايه يسوع المسيح مخلص إسرائيل أخيرا أشكرك يا رب
ميلاد حضرتك معرفتناش بنفسك
العجوز انا يا ابني من شيوخ إسرائيل وربنا من محبته سمح انه يطول فى عمري علشان أشوف مخلص إسرائيل ملك الملوك لانى شكيت ان ممكن العذراء تلد مخلص العالم
نادر تحب حضرتك تيجى معانا
العجوز لاء يا ابني المشوار طويل وصعب عليه لكن انا هاستناهم فى الهيكل اكيد هاييجوا وساعتها هاعمل اللي انا مستنيه من سنيين
ميلاد هاتعمل ايه قلنا
العجوز هاشيل المخلص على ايديه وهارفعه لفوق وهاقول " الان يا سيد تطلق عبدك بسلام حسب قولك لان عينيا قد أبصرتا خلاصك الذي أعددته قدام جميع الشعوب نورا تجلى للامم ومجدا لشعبك إسرائيل "
نادر لكن ليه السيد المسيح اختار يتولد فى بيت لحم
العجوز (( يتحدث وهو خارج )) لأن النبؤه كانت بتقول كده " وانت يا بيت لحم ارض يهوذا لست الصغرى بين رؤساء يهوذا لان منك يخرج مدبرا يرعى شعبي إسرائيل " ( يخرج ويختفي )
ميلاد على فكره انا عرفت مين الراجل اللى كان بيتكلم معانا دلوقتى
نادر وانا كمان عرفته بس مش ده المهم لانى برضه معرفتش الاجابه على السؤال بتاعنا ازاى المذود يكون جوايا
( فى اثناء كلام نادر يدخل رجل مسرعا ويصدم ميلاد )
ميلاد اه ....... حاسب يا استاذ
الرجل 1 معلش اصلى مستعجل شويه رايح بيت لحم والمشوار لسه طويل
نادر انت كمان رايح بيت لحم ماتستنا تاخدنا معاك
الرجل 1 لاء معلش دانا سايب الشغل وكل اللى ورايا حتى اصحابى اللى جايين معايا سبقتهم علشان أوصل بسرعه اصلهم لسه مش مصدقين
ميلاد مش مصدقين ايه ، هوه فيه حاجه حصلت
الرجل1 من ساعة ما الملاك ظهر لنا وبشرنا بالخبر المفرح وان المخلص اتولد فى المذود وكمان شفنا الملايكه بترنم وبتقول " المجد لله فى الاعالى وعلى الارض السلام وبالناس المسرة " وكلنا كنا مش مصدقين وخايفين
نادر وايه اللي حصلكم بعد كده
الرجل 1 الملاك طمنا وقال لنا " ماتخافوش وادانا علامة كمان علشان نعرف بيها المولاد ملك اليهود
نادر وايه هيه العلامه
الرجل1 قال لنا هاتلاقو طفل ملفوف ونايم فى مذود البقر
ميلاد وانت ماسئلتوش اشمعنا مذود البقر اللى اختار المسيح المخلص انه يتولد فيه
الرجل1 لاء مسئلتوش لكن كويس انه اتولد فى المذود لانه لو اتولد فى قصر زى كل الملوك هايكون صعب على الناس الغلابه والبسيطه اللى زينا انها تشوفه وتفرح بيه
نادر عندك حق يسوع المسيح اختار مكان متواضع وبسيط علشان يبقى قريب من كل الناس
ميلاد وكمان اختار الناس المتواضعه علشان يخليها تفرح مع الملايكه ، فعلا ربنا محبته كبيره قوى
الرجل1 احنا كمان بنحب كل الناس ومش بنزعل حد ابدا علشان كده حاسين ان ربنا اختارنا علشان محبتنا لبعضنا
نادر معقول ..... يعنى حته فى شغلك مش بتزعلوا او تتخاصموا
الرجل1 مينفعش نتخاصم لان معانا أمانه كبيره وعظيمة وبنلف الوديان والجبال وممكن نصارع ذئاب ووحوش علشان نحافظ على اللى معانا
ميلاد تصارعوا ذئاب ووحوش ياه دى شغلانه صعبه قوى
الرجل1 طبعا لان ممكن الواحد يضحى بحياته علشان اللى معاه او حتى علشان أصدقائه أنا هامشي بقى لانى اتاخرت عن اذنكم (( يخرج مسرعا ))
نادر يا ترى يا ميلاد احنا ممكن نحب بعض لدرجة ان واحد فينا يضحى من اجل التانى
ميلاد طبعا ممكن بدليل ان انا ضحيت وجيت معاك الرحله اللى مش عارف هاتنتهى ايمتى
(( يدخل رجل 2 ))
رجل2 لو سمحتوا ممكن تساعدوني
نادر اتفضل احنا تحت امرك
رجل2 حد فيكوا يعرف فين هايتولد ملك اليهود
ميلاد حضرتك شكلك غريب عن البلاد
رجل2 فعلا انا جيت مع اثنين زملائي من بلاد المشرق واحنا التلاته علماء فى الفلك وعاوزين نعرف فين هايتولد ملك اليهود
نادر ده مش بس ملك اليهود ده كمان ملك الملوك ورب الارباب
رجل2 طبعا طبعا علشان كده جينا ومعانا الهدايا اللى تليق بالملك العظيم لكن احنا مانعرفش نروح بيت لحم
ميلاد ولا احنا كمان نعرف نروح لاننا غرباء زيكم
رجل2 يبقى لازم نروح للملك وهو اكيد هايساعدنا عن اذنكم (( يخرج رجل 2 ))
ميلاد ماتيجى نروح معاهم للملك ونشوف هايعمل ايه
نادر احنا مش جايين نروح قصور الملوك احنا عاوزين نروح المذود ونلاقى اجابه للسؤال بتاعنا
ميلاد ايه ده بص هناك شايف الزحمه اللى جايه علينا
نادر ده باين عليه موكب الملك شفت يا عم اهو الملك بنفسه جاى لحد عندك
(( يظهر الملك فى جانب بعيد عندهم ))
الملك ازاى الكلام ده مافيش ملك هنا غيرى انا لازم اعرف الطفل المولود ده فين وكمان بيقولوا عليه ملك اليهود (( ينظر الى نادر وميلاد )) انتو مين
ميلاد اه ...... اه...... احنا اغراب عن البلاد
الملك البلد بقت مليانه اغراب وانا معرفش
نادر العفو يا مولاى الملك احنا جايين زياره سريعه وماشيين على طول ده طبعا بعد اذن مولاى الملك
الملك يعنى انتو عارفين انى انا الملك الاعظم للبلاد وما فيش ملك غيرى
ميلاد طبعا يا مولاى فى حد يقدر يقول غير كده
الملك ايوه فى اغراب تانى جايين يقولوا فين المولود ملك اليهود يعنى فى واحد اتولد طمعان فى الملك
نادر يمكن يا مولاى يكون ملك من نوع مختلف او يمكن مش طمعان فى الملك
الملك هوه انا لسه هاستنى لما اشوفه طمعان ولا لاء انا لازم اتصرف من دلوقتى
ميلاد يا مولاى ده لسه طفل مولود ولما يكبر تبقى تفكر فى الموضوع ده ، لكن دلوقتى قلنا نروح ازاى بيت لحم
الملك ايوه بيت لحم برافو عليك همه قالولى انه هايتولد فى بيت لحم (( نادر يدفع ميلاد بغيظ ))
انا لاقيت الحل هاصدر امر ملكى باعدام كل اطفال بيت لحم من عمر سنتين لغايه الطفل اللى لسه مولود النهارده (( يخرج الملك بسرعة ))
ميلاد (( وهو ممسك بنادر )) يا ظالم يا مفترى عملولك ايه الاطفال دى
نادر اسكت يا مجنون وطى صوتك انت مش عاوز ترجع بلدنا سليم ، وبعدين الاطفال يعتبروا شهداء لانهم ماتوا علشان خاطر المسيح اللى اتولد معاهم فى نفس البلد ونفس الوقت
ميلاد عندك حق لكن هانعمل ايه دلوقتى
نادر لازم نوصل بيت لحم بسرعه يمكن هناك نلاقى اجابه للسؤال بتاعنا
ميلاد سؤال ايه
نادر انت نسيت السؤال ازاى المذود يكون جوايا
ميلاد ايوه صحيح طيب شاور لنا على اى تاكسى معدى من قدامك
نادر تاكسى ايه انت كمان نسيت احنا موجودين فين ياللا بينا نشوف حل للمشوار ده
(( يخرج الاثنين ويدخل رجل من اهل البلد ))
الرجل 3 اشكرك يا رب لانك ارسلت ملايكتك تحرسنا وتبلغنا بامر الملك اللى عاوز يقتل الطفل يسوع ومن بكره الصبح هانهرب على ارض مصر (( يدخل نادر وميلاد ))
نادر السلام لك هوده المذود اللى فى بيت لحم
الرجل 3 اهلا وسهلا اتفضلوا عاوزين مين
نادر احنا بندور على الطفل يسوع
الرجل3 موجود جوه المذود ومعاه امه العذراء مريم
ميلاد فى حاجه مهمه عاوز اقولها لك ، الملك اصدر اوامر .............
الرجل3 انا عرفت كل حاجه ملاك الرب ظهر لى وقال كل حاجه وكمان امرنى اخذ الطفل وامه واهرب لمصر
نادر احنا ممكن نتعرف بحضرتك
رجل3 انا يا ابنى اللى حملت شرف مسئوليه الاسره ألصغيره دى من ساعة ما استلمت العذراء ام يسوع من الهيكل وعرفت انها حامل والملاك طمنى وقالي ان العذراء حبلى من الروح القدس
ميلاد يا بختك يا قديس يا عظيم
نادر لكن انا مش قادر افهم ليه اختار الرب يسوع المذود علشان يتولد فيه
الرجل3 لأنه مكان متواضع يقدر من خلاله الناس كلها تشوف الملك المولود وتفرح بالمخلص
ميلاد كان ممكن برضه كل ده يحصل حتى لو اتولد فى قصر زى كل الملوك
الرجل3 مش مهم قصر ولا مذود لانه جاى للعالم علشان يتولد جوانا احنا
ميلاد ونادر ازاى
الرجل3 لو قلبك فيه التواضع والبساطة اللى علشانهم اختار يسوع المذود ساعتها جوانا هايتولد يسوع وتكون قلوبنا هيه المذود اللى يختاره علشان كمان يسكن فيه
نادر تكون قلوبنا متواضعه وبسيطه ساعتها هاتكون هيه المذود انا دلوقتى فهمت
الرجل3 كمان لو قلوبنا مليانه حب لكل الناس وممكن تساع البشر كلهم زى المذود ما كان شايل مخلص البشريه كلها ساعتها هاتستحق وجود المسيح جواك
ميلاد وبالحب لكل الناس نستحق يكون المسيح جوانا انا كمان دلوقتى فهمت
الرجل3 اتفضلوا بقى علشان تشوفوا الطفل يسوع (( يتركهم ويدخل ويختفى ))
نادر فعلا يا ميلاد ابونا كان عنده حق فى كلامه
ميلاد ابونا مين
نادر يوهههههه انت لسه مش دريان بالدنيا اللى حواليك تعاله ندخل المذود علشان نشوف الطفل يسوع ملك الملوك
ميلاد مزود ايه يا ابنى احنا فى حوش الكنيسه انت باين الزعل اثر على دماغك
نادر (( يتلفت حوله )) ايوه صحيح يا خساره كان نفسى اشوف يسوع المسيح الهى
ميلاد ماهو موجود جوه فى الهيكل
نادر موجود ازاى مش فاهم
ميلاد اللى على المذبح جوه الكنيسه مش هوه جسد الرب ودمه جسد ودم حقيقى
نادر عندك حق يا ميلاد المره دى انت صاحى
ميلاد ممكن نلحق القداس ياللا بينا (( يختفى الاثنين ))
النهــــــــــــــــــــــــــــــــــــــــــــــ ـايه
الابراج