فكر قبل ماتموتني يا مان

أنا بجد نفسي كلنا نفكر زي ما أنا بفكر و أحنا مش هنموت أي صرصار خالص

يعني هو حد فيكم فكر الصرصار لما بتضربوه بالشبشب كان بيعمل أيه ساعتها

تعالوا نتخيل شويه مش يمكن............................................أو يمكن

__________________________________________________ _________

كان عازم علي الغدا خطيبته اللي كانت بينهم قصه حب حكي عنها كل صرصار و

صرصاره و انت نهيتها في ثانيه

كان رايح يستلم بلاعته في مشروع أسكان شباب الصراصير اللي مستنيها من 8

سنين و كان هيموت عليها و اهو مات

كان خارج من عند الدكتور اللي قاله من 6 أشهر أنه هيموت بعد 6 أشهر و جه

دلوقتي قاله انه كان غلطان و بعد ما فرح أنت أثبت ان الدكتور كان توقعه صح ان

هييجي واحد غتت شبهك و يموته

كان طالع من سايبر ""صراصيرو نت"" و جاب نتيجته و جاب مجموع يدخله كليه

تعدين اللي كان ممكن يكونله مستقبل فيها و يشتغل في فريق الصراصير الدولي

للتنقيب عن الطعام المستخبي

كان رايح يسلم برائه اختراع لأختراعه اللي كان هيقلب عالم الصراصير و يخلي كل

صرصار ماشي و لا همه حد و هو جهاز حمايه يشمل مضاد للمبيدات الحشريه و

درع واقي من الأحذيه و انبوبه أكسجين اذا غرق في كوبايه ميه و لا حاجه الشر

برا و بعيد


كان حاطط الهاند فري في ودنه و مشغل الأغاني علي أعلي حاجه و عمال يغني

معاها "" وانا هعيش حياتي بعد منك هنا"""وانت ضيعت أمله في الحياه بخبطه

كان رايح يستشهد من أجل أسترداد حقه هو و أهله في بلاعتهم المحتله و أنت

ضيعت عليه الأجر و الثواب (يامفتري) عليك ربنا

كان رايح يسجل أغنيتين من الألبوم الجديد أسمهم""" يا حبيبتي يا صرصورتي"""

و """علي غطي البلاعه أتقابلنا"""والألبوم ده كان متوقعله انه يكسر أرادات

الهضبه (بتاعهم)

كان رايح يشارك في منتخب الصراصير القومي للبلاعه رقم 18 لأن كان عندهم

ماتش نهائي مع فريق البلاعه رقم 14 و أنت ضيعت منهم كأس البلاعات السنه دي

كان رئيس جمهوريه البلاعات و رايح يحضر مؤتمر علشان يحل موضوع الهجره

الغير شرعيه للصراصير من جمهوريه البلاعات القوميه.... للتلاجه (قال ايه فيها

أكل أكتر)..... بيحلم
__________________________________________________ __________

دي مجرد 10 حاجات ممكن كان الصرصار بيعملها تخليك ما تموتهوش.....فكر

هتلاقي حاجات أكتر بياما....فأرجوكم أرحموهم

بس في حاله واحده لو موت فيها الصرصار تبقي نجدته فيها

هي انه كان رايح ينتحر و انت لحقته قبل ماينتحر و موته شهيد للشبشب
__________________________________________________ ___________

أتمني الموضوع يكون عجبكم و تكونوا ضحكتوا بجد وياريت ما تموتوش صرصار

تاني:d:d